Пятрусь Броўка. 115 гадоў з дня нараджэння.
25 чэрвеня 2020 года адзначаецца 115 гадоў з дня нараджэння Пятруся Броўкі, Народнага паэта Беларусі,
грамадскага дзеяча, акадэміка НАН Беларусі, Заслужанага дзеяча навукі Беларусі.
Перш за ўсё Пятрусь Броўка вядомы сваёй грамадзянскай і ваеннай лірыкай. Ранняя творчасць паэта мае шмат заклікаў і нават лозунгаў, пра што выразна сведчаць назвы зборнікаў яго паэзіі, якія выходзілі ў пачатку 30-х гадоў мінулага стагоддзя: "Гады, як шторм", "Цэхавыя будні".
У час вайны вершы Пятруся Броўкі сцвяржаюць непераможнасць беларускага народу - ён нават піша некалькі эпічных твораў, напоўненых патрыятычным пафасам.
Больш позняму перыяду творчасці паэта ўласцівы тонкі лірызм і замілаванне прыгажосцю роднай прыроды і беларускіх жанчын. Вершы Пятруся Броўкі пра каханне - гэта сапраўдная энцыклапедыя душы, з усімі яе трызненнямі і радасцю.
Дарог у свеце многа,
А ты між іх сваю знайдзі.
Няхай нялёгкая дарога,
А ты ідзі,
А ты ідзі!..
Няхай цябе віхор збівае,
Няхай трывожна даль гудзіць,
Няхай сцяжынку замятае,
А ты ідзі,
А ты ідзі!..
Няхай звісаюць цемрай ночы,
А ты на зорку ўдаль глядзі
Няхай пясок і золь у вочы,
А ты ідзі,
А ты ідзі!..
Няхай, абы ты верыў прагна,
Няхай жуда, няхай адзін,
Няхай каменне, твань і багна...
А ты ідзі,
А ты ідзі!..
